【按语】下录谚语来自南京师范大学中文系叶祥苓教授的《苏州方言志·第八章苏州话标音举例·一、谚语》（有删节），虽大部分是苏州地区百姓嘴上向流传已久格搭气象、搭农事相关格谚语。但是，箇当中也包含一些古人格治家搭处世格言、惊语，也有一些则是嘲讽日常生活琐事格打油诗、顺口溜，还有一些是百姓嘴里常说格歇后语。尽我所知，做一些简单解释。错谬不当之处，敬请众博友教正。

两春夹一冬，呒被暖烘烘。——“春”是指“春季”。“立春”通常在每年格二月四日前后。如果“立春”出现在传统格中国新年，即“春节”来临之前，箇末，箇个一年就是“两春夹一冬”。箇个一个现象就可以预测箇个一年格冬天就可能勿会忒冷。甚至呒不被头，也勿会觉得夜里向冷。也就是现在所说格“暖冬”。

春打六九头，种田勿用愁；春打五九脚，种田吃一吓。——该句闲话里向格“春”，是指“立春”箇个节气；九，中国古代民间传统拿从“冬至”节箇日起开始计算，此后（包括“冬至”）的八十一日，认为是一年当中最最寒冷的时期，分成功九段，每一段是九日天，称为一个“九”，一共是九个“九”。假使“立春”箇天恰好搭第六个“九”格第一日天碰头。箇末，箇个一年对靠种田为生格农民来说，会是一个风调雨顺，田里向农事轻松，庄稼格收成也好格好年成。所以农民种田就用勿着“发愁”哉。假使“立春”箇日搭第五个“九”格押末一日相逢，箇末，箇个一年对农民来说可能就会是多灾多难格一年。所以要“吃一吓”哉。

春寒冻煞（杀）老黄牛。——一般侪认为，春天来临，气温回升，人身上格汗毛孔侪张开哉，一旦有冷空气袭来，感觉会比冬天还要冷。特别是身体虚弱格老年人更加容易感受风寒而生病。该搭格“老黄牛”并不是指真正意义上牛，而是指“身体虚弱”格老年人。

廿七、廿八（大风）吹得庙门开，螺蛳蚌蚬（苦）哀哀。——“廿七、廿八”，即指农历二月廿七、廿八箇两日。如果出现刮南风格天气，预兆箇个一年是雨水偏少格干旱年份。因为一般寺庙格大门侪是朝南开嘅，而且寺院格大门侪比较沉重，只有从南面吹得来格风力强劲格南风方始能拿庙门吹开，所以说“庙门开”就是指吹“南风”格意思。

清明晒得沟底白，青草会变麦。——“清明”是指“清明节”。“沟底白”，是说因为太阳暴晒，水分加速蒸发，以至于麦田垄沟底上格烂泥畁太阳晒得泛出仔白色来。“青草”是指麦田里向格“野（杂）草”。清明时节太阳过分强烈，说明当时气温高，水分蒸发快，长勒田垄上格麦苗因水分缺乏而生长受到抑制。相反，生长勒垄沟里格杂野草因为能够吸收到泥土深层格水分，生长旺盛，胜过田垄上的麦苗。这就是告诫农民这时应当加强除草、灌溉等田间管理，来帮助田里格麦苗生长。

谷雨西风没小桥。——谷雨，是指“谷雨节气”格当日。谷雨当日假使吹格是西风，预示以后格日脚里向会是多洪涝灾害格农情，洪水会拿乡下头箇种低矮格小桥、便桥淹没。预示百姓要加强抗洪排涝格工作。

四月十四雨点响，蓑衣箬帽一抢光。——“四月十四”指农历格日脚。“蓑衣箬帽”，是农民雨天常常穿戴格雨具。假使勒箇日天落雨，箇末就预示箇年可能会提前进入黄梅天，而且入梅后雨水会偏多。所以农民就要早一点拿要用格蓑衣箬帽买转来，做好落雨天里做田里生活格防备。顺便提一提：据说箇日还是八仙当中格吕洞宾格生日，称为“神仙生日”。勒苏州老阊门城里泰伯庙桥北有一只神仙庙，苏州人有（农历）四月十四轧神仙格习俗。我勒苏州桃花坞市四中读书格辰光，每逢箇个一日，也会勒中上向搭仔同学一淘到神仙庙里去轧神仙嘅。

做天难做四月天，秧要日头麻要雨，蚕要温和麦要寒。——秧，秧田里格水稻秧苗。麻，苎麻。蚕，勒江南一年两季：春蚕搭秋蚕，农历四月份格蚕是春蚕，需要保持一定生长发育格温度。江南场化格麦是要越冬格冬小麦，农历四月天气转暖，麦苗刚刚返青，箇个辰光过分暖热格天气对小麦格生长反而呒不好处。

未（朆）吃端午粽，棉衣勿入笼；吃仔端午粽，还要冻三冻。——虽然端午时节从农事节气来看已经到了夏初，天气也让人感觉到了箇种暖意，但是从气象角度来讲，还属于季节交替时段，冷暖交替，气候多变，尚不稳定。即使是过仔端午节，还会有寒流南下侵袭。该条谚语就是要告诉伲大家不要急着拿御寒格棉衣收入箱笼之中，应该先等一段时间，待天气稳定之后再放起来。

二十分龙廿一雨，石头缝里尽（侪）是米。——二十是指农历五月二十，被称之为“分龙日”。这是说一过分龙之日，天就降雨，是风调雨顺、五谷丰登格好兆头。

六月勿热，五谷勿结。——秋粮作物往往都是在最炎热格时候抽穗灌浆，天气越热稻谷格浆水越足，籽粒越饱满。反之，则多瘪籽。

小暑一声雷，倒转做黄梅。——另一种说法叫作“小暑一声雷，四十五日倒黄梅”。小暑，即二十四节气中格小暑。箇日不能打雷落雨。如果落雨打雷，梅雨季节就可能会延长。

早立秋，凉飕飕；夜（晚、或晏。读作[ei爱]）立秋，热休休（吼吼）。——立秋，是指二十四节气中的立秋节。这则谚语说格是立秋格辰光是勒早晨，还是下午至傍晚，如果立秋时间勒早晨，立秋之后热的辰光不会忒长，反之，如果勒下午或傍晚，立秋以后气温降不下来，热格辰光也会比较长。

处暑十八盆；白露身不露。——处暑、白露，侪是二十四个农事节气当中格重要节气。这是说，处暑一到表示像夏天箇种暑热即将结束，此后天气渐凉，不需要日日淴浴哉；过仔白露，早晚天气较凉，不能穿短袖子格衣服哉，更加不可以赤膊露身。

八月十五云遮月，来岁元宵雨打灯。——八月十五，是指农历八月半，也就是传统格“中秋节”。“元宵”是农历正月十五，全国各地侪会举办灯会嘅。该句谚语是说，假使中秋节箇日，夜头云彩拿月亮遮没脱，箇末，第二年格正月十五，元宵节就可能是个落雨天。也就会出现“雨打灯”格情形哉。旧年中秋节，因为“云遮月”,所以南京人朆有赏月格机会，勿晓得今年格“元宵”会勿会“雨打灯”。让伲大家一淘来验证验证该条预测气象格谚语啊灵勿灵。

九月南风当日雨，十月南风干到底。——九月、十月，都是指农历的月份。箇句谚语是说，农历九月份格天气，只要一吹南风，当日就会有雨落下来；而农历十月份格天气，只要南风一起，就是长时间干旱格信号。从此就会持续干旱少雨，而且箇种干旱少雨现象会一直持续到农历格年底。

九月十三落，皮匠家婆要吃肉；九月十三晴，皮匠家婆要嫁人。——农历九月十三这天落雨，往后就会使多雨的天气，妇女不要下田干活，唯一可做格事体就是做鞋子，皮匠鞝鞋子格生意不断，日脚就会过得富裕些。反之，皮匠格生意不好，日脚就难过。

干净冬至邋遢年，邋遢冬至干净年。——干净，是指天气好；邋遢，则是说天气不好，阴雨绵绵；冬至，是二十四节气中格一个重要节气；年，是指农历新年，即春节。假使冬至箇日落雨，春节就可能是好天；反过来，假使冬至箇日是好天，箇末，过年格辰光就呒不好天哉。

太阳睏晏朝，晒到中午地皮焦。——睏晏朝，即“睡懒觉”。因为天空当中有迷露，所以太阳虽然已经升仔起来哉，但是还迟迟勿肯露面，拿实梗格现象说成“太阳睏晏朝”，拟人化格手法非常形象，非常幽默。每转碰着实梗格天气，中上格气温就感觉特别高。还有一种说法，叫做“迷露开，晒得呆（呆，读作[?E碍]。是说人勒太阳头里暖热得呆瞪瞪格想睏觉）”。

乌头云（风），白头雨。——“乌头”、“白头”，侪是指夏天起阵头辰光，天空上云头格颜色。从天边滚滚而来格云头格颜色假使是乌黑格颜色，箇末，跟得来格会是一阵阵清凉格大风。假使云是灰白色格，箇末，跟得来格马上就是一阵倾盆大雨哉。

东鲎日头西鲎雨。——鲎（读音近似“吼”），就是雨后天晴而勒天空上出现格彩虹。彩虹勒天上向格位置，正好搭太阳遥遥相对。东鲎，就是说天上格彩虹勒东面个天空上，箇就说明已经到仔太阳落山格辰光。因为雨已经落过，空气中湿度降低，第二日会是晴或少云格天气。西鲎，是说彩虹挂勒西面格天空上，箇末辰光还是一大清早。彩虹格形成搭空气当中个水分密切相关。天上有鲎，就说明空气中湿度还是交关大，箇个一日天里向还是会落雨嘅。

东南风，暖烘烘；东北风，雨淞淞；西南风，阴洞洞；西北风，落雪像牵砻。——冬天，如果吹东南风，一定是个暖融融格晴天；如果吹东北风，就会是个绵绵阴雨格天气；如果吹起西南风来，天气就会显得干燥而阴冷；如果是西北风阵阵，就会带来满天纷纷扬扬格雪花哉。

腊雪勿烊（炀），种田人饭粮；春雪勿烊（炀），饿断肚肠。——腊雪不化，说明冬天特别寒冷，开春后就勿会担心田里农作物格虫害，夏天格收成会增加；立春后的雪称为“春雪”。春雪不化，春天气温过低，农作物会受冻害，以致于夏收作物减产歉收，农民就要饿肚皮哉。

六月初三打个阵，上昼耘稻下昼睏。——也有说“一日一个阵，上昼耘稻下昼睏”。如果农历六月个天气如果经常出现阵雨，田里格农事就比较轻松。

东霍霍，西霍霍，早晨起来干涸涸（读[ho ho]）。——“闪电”，苏州闲话叫“霍显”。霍霍，是说箇种几乎听勿见雷响声音格霍显（闪电），而且霍显格亮度也勿亮。往往只看见“东霍霍，西霍霍”箇种云层里向格放电现象，空气当中呒不潮湿格感觉，呒不雨落下来，所以第二日天早上起来看见地下仍旧是干格。

细雨落满田；夏雨隔爿田。——细撒蒙蒙格日脚往往是满天格阴云，落雨格范围比较大；夏天出现格阵雨常常是小范围段时间格急雨，出现“东边日出西边雨”，甚至“隔岸看落雨”实梗格所谓“隔爿田”格现象。

三朝迷露发（起）西风。——深秋时节开始，只要出现连日大雾弥漫格天气，箇就是要吹起西风，气温要下降格预兆。

谷雨西南多浸种，立夏西南少下秧。（西南，指刮西南风格天气，主干旱。浸种，则有催芽格作用。）

三春靠一冬，三早抵一工。——隐喻勤劳才有成效。

头伏芝麻二伏豆，三伏天里种绿豆。（箇则农谚是说苏州地区农民种豆、种麻格农时。）

勤三年成桑，懒三年剩桩。——隐喻只有勤劳才能致富。

养仔三年蚀本猪，田里饱滋滋。（三年格猪窠灰沃勒田里，使得田里格泥土肥力大幅增加。）

五荒六月，七死八活。——箇一则谚语是告诉农民，千万勿能荒废春天格农事，否则夏季就会呒不收成，人就要过忍饥挨饿格日脚。因为田里格水稻长到农历六月份刚刚拔节、抽穗、扬花，直到七月还勿能开镰收割，一直要到八月秋收格辰光方始能够过得好起来。

打碎水缸印（洇）过来。——隐喻提示、串通等行为。

敲脱牙子望肚里咽。——（歇后语）意为“有苦难言”。

偷鸡勿着蚀把米。——（人生格言）警告人覅贪小便宜，弄勿好还要倒贴。

偷来锣鼓敲勿响。——（人生格言）勿是真格敲勿响，因为是偷来格物事，不敢敲而已。警示人覅贪小便宜；勿是自家格物事覅拿，拿仔转来也是派勿着用场嘅。

筷五（当作“儿”）头浪出孝子，棒头浪（向）出逆子。——这句话勒我格映象里向似乎有点错位，应该是“棒头浪向出孝子，筷儿头浪出逆子”。按照旧式的礼教，孩子要严加管教，才能有出息，一味地宠幸，孩子反而要变坏。

拨仔三分颜色，要（想）开大红染（读作[nie念]）坊。——比喻“自不量力，得寸进尺”格意思。

天塌下来自有长人顶。——告诉大家做事体只要一心一意格拿事体做好，覅缩手缩脚，胆小怕事。

船到桥洞（头）自然直。——（人生格言）还有一句相同意思格闲话，叫做“车到山前必有路”。寓意“要勿怕困难，迎难而上”。

羊肉朆吃（着），惹仔一身（格）骚。——（人生格言）警告人勿应该插手格事体，就要远离，以免惹祸上身。

木匠屋里三脚凳。——搭还有一句：“泥水匠人住草棚”一样，侪反映过去劳动人民生活格艰难搭俭朴。

卖油娘子水梳（读作[si师]）头。——同上面一句一样格意思。

急惊风碰着慢郎中。——（歇后语）意为“欲速则不达”。

好男勿吃分家饭，好女勿着嫁时衣。——（人生格言）教导小辈为人处世要有志气，要自力更生。

打狗要看主人面。——（处事格言）隐喻为人处世一定要顾及他人个面子，不可以随心所欲，要有分寸。

该（赅）仔和尚骂贼秃。——意为“指桑骂槐”。

行仔春风收夏雨。——隐喻“行仔好心呒不好报”。

起早起碰着隔夜人。——隐喻晦气、勿顺心。

日里勿欠馄饨钿，夜里敲更勿吃惊。——（人生格言）另一种说法，叫做“日里勿做亏心事，半夜敲门心弗惊”。）

冷勒风里，穷勒债浪。——（人生格言）

虱多勿痒，债多勿愁。——（嘲讽世事格顺口溜）对靠借债过日脚格人格嘲讽。

瘌痢头儿（读作[ni呢]）子自家葛好。——（歇后语）讽刺喜欢护短格人。

吃仔灯草灰，放（格）清（巧）屁。——（嘲讽世事格顺口溜）嘲讽说闲话勿加思考，勿负责任格人”。

一丈水退脱八尺。——隐喻“丧失信心”；“心灰意冷”。

烧香烧勒枯庙里。——（歇后语）意为“走错门路”。

摇仔三日三夜橹，（还）朆解缆绳。（歇后语）意为“白忙一气”。

造屋请仔箍桶匠。——（歇后语）意为“请错仔人”或“勿对门路”。

盐钵头里出蛆。——隐喻事情不可能发生。

乖人（好汉）勿吃眼前亏。——（人生格言）

狗嘴里夺（吐）勿出象牙来。——隐喻一个人说话勿中听。

吃素碰着月大。——（嘲讽世事格顺口溜）还有意思相近格顺口溜，叫做“屋漏偏遭连夜雨；趁船总遇顶头风”。意为凡事侪勿顺利。

真金勿怕火（来）烧（炼）。——（人生格言）

绣花枕头一包草。——（歇后语）隐喻表面上好看，呒不实质内容。

老虎头浪拍苍蝇。——（歇后语）意为“做危险格事体”；“勒浪寻死”。

猫哭老鼠假慈悲。——（歇后语），意为“装腔作势”。

赊一千勿如现八百。——（人生经验）

六月债，还得快。——（人生格言）该句闲话讲格是因果报应格事体：隐喻作恶以后，报应快速。

七石缸，门里大。——（嘲讽世事格顺口溜）嘲讽箇种只会对内施展威风，勒外头连气也不敢出格人。

吃，受用；着，威风；赌，一半；嫖，落空。——（人生格言。）

阎王好见，小鬼（读作“举”）难挡。——（人生格言）警示大家要提防箇些地位勿高而常常仗势弄权格人。

过桥落篷，过河拆桥。——（人生格言）

勿怕勿识货，只怕货比货。——（人生经验）告诉大家要多调查，多比较。只有通过充分格调查、比较，方始能够分出高低、好坏来。

黄毛丫头十八变，临时上轿还要变三变。——上轿，过去女孩子结婚是要坐花轿嘅。反映女小囡格青春期间变化极大，大到临近结婚格辰光还有变化嘞。

药补勿如食补。——（人生经验）告诫想强身健体，延年益寿格人，覅一维格依靠吃补药来达到自家格目的，而主要应该注意平常辰光格饮食格营养搭配。俗话说：“是药三分毒。”补药也是一样嘅。进补过头会弄巧成拙，勿但无益反而有害。

小暑里黄鳝赛人参。——（人生经验）

关老爷面前使大刀。——（歇后语）意为“自不量力”。

孔夫子面前读孝（书）经。——（歇后语）意为“自不量力”。

暴学三年，天下去得，在学三年，寸步难行。——（人生格言）

顺风篷勿能扯足。——（人生格言）勒江河湖海个睡眠上行船，顺风格辰光，篷扯得忒足，转弯个辰光容易翻船。用船上人格行船经验来警示大家，为人处世勿能够勿留转弯格余地，否则就容易出事体。

螺蛳壳里做道场。——（歇后语），意为“轧闹猛”。

三年徒弟苦黄连。——（人生经验）徒弟，即学徒。黄连，是一味极苦格中草药。隐喻学徒期间格日脚是要吃尽千辛万苦，方始能够学着本事。

若要黑心人，吃素淘里寻。——（嘲讽世事格顺口溜）该句闲话格意思搭“亦想做婊子，还想立牌坊”格意思相同，只是说话个角度勿同而已。

满饭好吃，满话难说。——（人生格言）提醒大家勿论做事体还是讲闲话，侪要搭自家留有余地。

吃仔河豚，百样呒味。——（人生经验）因为河豚鱼味道鲜美，所以吃过河豚鱼格人就会觉得别格物事再好吃，也侪觉着呒不味道哉。也因为河豚是有毒格鱼，弄得勿好，吃仔会得死人嘅，所以吃河豚是要有拚死格决心嘅。也就是俗话所谓格“拚死吃河豚”。

坐得正，立得稳，哪怕和尚师姑合（佮，侪读作[k?葛]）板凳。——（人生格言）还有一句意思相近的格言，叫做“人正勿怕影子斜”。意为只要自家正直、正派、公正，就覅怕有人说三道四。

抱勿上树刘阿斗。——嘲讽呒不能力，呒不出息格人。

冷镬子里爆出个热栗子。——（歇后语）意为“出仔奇迹哉”。

眼睛一眨，老孵（读作[bu埠]）鸡变鸭。——（人生格言）比喻世事格快速变化。

马甲呒不罩袖，说话呒不饶（读作[ni?绕去声]）头。——（人生格言）告诉大家勿管是做事体，还是讲闲话，侪要实事求是，覅去做“画蛇添足”格蠢事。

看人挑担勿吃力，自家挑担步步歇。——（嘲讽世事格顺口溜）告诉大家万事侪要经过自家格亲身实践搭仔深入调查，方始有发言格权利。

描金箱子白铜锁，外头好看里向空。——（嘲讽世事格顺口溜）搭前头箇句“绣花枕头一包草”一样格意思。比喻只会摆虚头，呒不一点实效。

身浪软披披，屋里呒不夜饭米。——（嘲讽世事格顺口溜）

孛篮大葛水花，扫帚大葛尾（读作[ni尼]）巴，捞起来一只糠虾。——（嘲讽世事格顺口溜）讽刺做起事体来只讲究排场，勿讲求实效格人。

假客气碰着真老实。——（嘲讽世事格顺口溜）隐喻“事与愿违”。

朆进山门，就想做当家和尚。——（嘲讽世事格顺口溜）隐喻：“勿切实际”，“异想天开”。

要和尚，求和尚，覅和尚，杀和尚。——（嘲讽世事格顺口溜）嘲讽箇些勿晓得用人之道的所作所为。

镬子防热掇；长线放远鹞。——（人生格言）警示大家，做事体要讲究策略，要求有豪格结果，必须要有耐性搭恒性。

白乘仔航船，还嫌比杉木臭。——（嘲讽世事格顺口溜）嘲讽箇些得寸进尺，贪得无厌格人。

拾着仔象牙筷配穷人家。——与之意思相近格一句说话，叫做“好花插勒牛粪浪”。比喻“勿相配”。

俏媚眼做拨瞎子看。——（歇后语）意为“自以为是格无效之举”。

柴米夫妻，酒肉朋友。——（人生格言）告诉人，只晓得柴、米格夫妻，是呒不感情基础嘅，勿能够长久厮守，白头到老嘅；只讲求吃吃喝喝格朋友也是呒不感情，勿讲义气嘅，勿是真正格朋友，友情也勿会长久嘅。隐喻勿能长久。

吃得过，臭乳腐；着得过，老粗布，困（睏）得过，稻柴铺。——（人生格言）

吃尽天边盐好，走尽天边娘好。——（人生格言）

香伙赶出和尚，长洲勿让吴县。——隐喻“喧宾夺主”。